و انا اتنقل بين هذه المحطات توقفت عند المحطة الاردنية .. و قلت و الله زمان عنك .. خلينا نشوف شي جديد ..

كان مبلش برنامج اسمه الوطن للجميع على ما أظن .. المهم المذيع بدخل على كل شوفير باص او سرفيس بالمجمع و بسأله ليش مش حالق لحيتك و ليش مش مزبط حالك .. طبعا انا وقتها شعرت بالقهر و كنت حابب امسك المذيع و الخمه تلخيم .. مفكر حاله الناس فاضية تفكر في هيك سوالف فاضية .. او ان الناس معها توكل مشان تفكر تحلق ..

المهم سأل ختيار هادا السؤال جاوبه الختيار بكل عفوية .. يا بني انا مش ملاقي اكل بدك ياني احلق كل يوم .. انا بحلق كل أثنين و خميس .. نط المذيع حكى له بس اثنين و خميس .. نطيت انا و طقعته مسبة خزقت اذنه فيها .. نط الختيار حكى له بدك ياني اشتري شفرة كل يوم في 15 قرش .. يا زلمة خاف الله ..

سأل واحد ثاني نفس السؤال حكى له يا رجل انا بحلق كل خميس و هيك شايف انه مناسب كثير .. حكى له كيف كل خميس ما بصير .. اتخيل سايح يشوفك .. انداري يعني مهم السايح يشوفني .. يا عيني على هالمذيع بخاف على شعور السياح او بخاف على السياح اكثر من ولاد بلده .. اخ بس لو اقضبه ..

سأل واحد تاني حكاله و بعصبية يعني انتا مفكر كل العالم فاضية متلك و مفكر كل الناس معها تحلق كل يوم مثلك و ليش احلق كل يوم بصحى الساعة 5 الفجر و برجع الساعة 11 بالليل .. منيح اني بشوف عيلتي .. و جد السايق و لعت معه و كان يحكي و هو مقهور ..

يعني انداري عن المذيع مترك كل الفساد الي في البلد و داير ورى الشوفيرية بده ياهم يحلقوا ذقنهم شو همّي كاينين في العسكرية ولا شو القصة .. مش هيك الواحد بينصح الثاني بتجريح و بمسخرة .. بدك تنصح انصح بالحكمة ..

بعدين مين حطه مسؤول عن لحية الشعب و على اي اساس الشوفير يحلق كل يوم .. !

يا زلمة الله يعين الشوفيرية شو بشوفوا كل يوم من نكد و قرف و من مواطنين و ازمات و سواقين و ضوضاء .. يعني الله يعينهم و هادا كله مشان 7 دنانير اخر الليل .. الله يعنهم و يصبرهم ..